सोलापूर महापालिकेत अनेक स्थानिक दिग्गज नेत्यांना पराभवाचा धक्का : सोलापुरातील ५ माजी महापौरांचा पराभव झाला !

 

सोलापूर शहर; प्रतिनिधी लोकराज्य मराठी न्यूज नेटवर्क (महाराष्ट्र) 

 राज्यातील २९ महापालिका निवडणुकांच्या निकालाचे अंतिम कल हाती आले आहेत. बहुतांश जिल्ह्यात भाजप पुन्हा एकदा मोठा पक्ष ठरल्याचे दिसून आलं आहे. सोलापुरात देखील भाजपची सत्ता आली आहे. त्यामुळं भाजपचा महापौर होणार हे जवळफास निश्चित झालं आहे. दरम्यान सोलापूर महापालिकेत अनेक स्थानिक दिग्गज नेत्यांना पराभवाचा धक्का बसला आहे.  सोलापुरातील ५ माजी महापौर, तीन माजी उपमहापौर, २ माजी सभागृह नेत्यांसह अनेक दिग्गज नेत्यांचा पराभव झाला आहे.

कोण कोणत्या नेत्यांना पराभवाचा धक्का 

काँग्रेसचे माजी महापौर आरिफ शेख, संजय हेमगड्डी, ठाकरे गटाच्या माजी महापौर अलका राठोड, समाजवादी पक्षाकडून रिंगणात उतरलेले माजी महापौर यू. एन. बेरिया, तर अपक्ष राहिलेले माजी महापौर मनोहर सपाटे यांचा दारुण पराभव झाला आहे. तर भाजपकडून रिंगणात उतरलेले माजी उपमहापौर दिलीप कोल्हे, पद्माकर काळे, काँग्रेसचे माजी उपमहापौर राजेंद्र कलंद्री यांचा ही परभव झाला आहे. तसेच भाजपचे माजी उपमहापौर राजेश काळे यांच्या पत्नी उषा काळे यांना ही पराभवाचा धक्का बसला आहे.  

भाजपचे माजी सभागृह नेते सुरेश पाटील, श्रीनिवास करली यांचा ही पराभव झाला आहे. सोलापुरातील प्रभाग ५ मध्ये राष्ट्रवादी काँग्रेस अजित पवार गटाचे प्रदेश उपाध्यक्ष, दलित चळवळीतील मोठं नावं असलेले आनंद चंदनशिवे यांचा ही भाजप उमेदवारांकडून पराभव झाला आहे. याशिवाय राष्ट्रवादीचे तौफिक शेख, एमआयएमच्या फिरदोस पटेल, शिवसेनेचे मनोज शेजवाल, काँग्रेसचे रियाज हुंडेकरी, एमआयएमचे माजी गटनेते रियाज खरादी यांचा पराभव झाला आहे.

सोलापूर महापालिका निवडणुकीत भारतीय जनता पक्षाने आतापर्यंतची उच्चांकी कामगिरी केली.

 आतापर्यंतची उच्चांकी कामगिरी नोंदवत तब्बल ८७ जागा जिंकल्या आहेत. पालकमंत्री जयकुमार गोरे यांचे नेतृत्व त्यांना. आमदार विजयकुमार देशमुख, आमदार सुभाष देशमुख, सचिन कल्याणशेट्टी, देवेंद्र कोठे यांची मिळालेली खंबीर साथ यामुळे भाजपने सोलापूरमध्ये ऐतिहासिक विजय नोंदवला आहे. सोलापूर महापालिकेत आता भाजपची निर्विवाद सत्ता असणार आहे. सोलापूर. महापालिकेच्या १०२ जागांपैकी ८७ जागा एकट्या भाजपने जिंकल्या आहेत. भाजपनंतर सोलापुरात एमआयएमने आठ, तर शिवसेनेने चार, काँग्रेसने दोन, राष्ट्रवादी काँग्रेसने एक जागा जिंकली आहे. भाजपची विजयाची ही टक्केवारी ८५ इतकी आहे. भाजपच्या या महालाटेत काँग्रेस, राष्ट्रवादी, शिवसेनेच्या मातब्बरांना मानहानीकारक पराभवाला सामोरे जावे लागले आहे.

लोकराज्य मराठी न्यूज नेटवर्क जाहिराती व बातम्यांसाठी संपर्क 

                     

             मोहसीन इसाक खान

                       (८६०५१७१९१७)

                     रोहन हनुमंत हिवराळे

                      ‌(८६६८६१००५०)